Монголын байгаль орчны иргэний зөвлөлөөс өнөөдөр Монгол улсын ерөнхийлөгч, УИХ, Засгийн газарт мэдэгдэл хүргүүллээ. Тэд Алт2 хөтөлбөрийг хэрэгжүүлэх шийдвэрийг нэн даруй зогсоох, Уул уурхайн лицензүүдийг шинээр олгох зэрэг хууль бус үйл ажиллагааг эсэргүүцсэн 12 зүйл бүхий мэдэгдлийг засгийн газарт хүргүүлэхээ мэдэгдлээ.  Тэд мэдэгдэл хүргүүлэх болсон шалтгаанаа Алт 2 хөтөлбөрийн хүрээнд уул уурхайн компаниуд газар шороогоо ухаж сүйтгэн, байгаль дэлхийгээ гамшгийн хэмжээнд хүргэж байна. Тухайлбал саяхан Төв аймгийн Заамар сум болон Баянхонгор аймагт болсон малчид, ард иргэдийн тэмцэл энэ гамшгийн нэг тод жишээ гэдгийг хэлж байсан юм. Иймд Монголын байгаль орчны иргэний зөвлөлөөс Алт 2 хөтөлбөрийг яаралтай зогсоохыг төр засгаас шаардаж байна. Мөн үүнээс гадна байгаль орчны асуудлаар мөнгө угаадаг гадаад дотоодын хамтарсан сүлжээ, бүлэглэлийг ил болгож, Үндэстэн дамнасан корпорацуудын захиалга, санхүүжилтээр ажилладаг зарим байгууллагын үйл ажиллагааг хянаж, таслан зогсоохыг шаардаж байна.  Монголын байгаль орчны иргэний зөвлөлөөс Засгийн газарт 12 зүйл бүхий мэдэгдлийг хүргүүлж, салбарын хэмжээнд шийдэх асуудлыг Байгаль орчин аялал жуулчлалын шинэ сайдтай уулзаж тусад нь шаардахаа хэллээ. Тэд байгаль орчны чиглэлээр төр засагтай хамтран уул уурхайгаас үлдэж байгаа экологийн ул мөрийг арилгах, хохирлыг нөхөн төлүүлэх, лиценз зөвшөөрлүүдэд хяналт тавьж, нөхөн сэргээлт хийлгүүлэх, байгаль орчны салбар дахь хууль бус үйлдлүүдийг илчилж, таслан зогсоох, хариуцлага хүлээлгэнэ гэдгээ хэлж байсан юм.

Эх сурвалж: http://www.tv5.mn/news/191/6756